తెలంగాణ ఉద్యోగులు, పెన్షనర్ల ఆరోగ్య పథకం ప్రారంభం

హైదరాబాద్ : తెలంగాణ ప్రభుత్వ ఉద్యోగులు, పెన్షనర్లకు నగదు రహిత చికిత్సల కోసం రూపొందించిన ఉద్యోగుల నూతన ఆరోగ్య పథకాన్ని మంత్రి దామోదర రాజనర్సింహతో కలిసి ఉప ముఖ్యమంత్రి భట్టి విక్రమార్క శుక్రవారం ప్రారంభించారు. నూతన ఈహెచ్‌ఎస్ పోర్టల్, హెల్త్‌కార్డులను వారు ఆవిష్కరించారు. ఈ సందర్భంగా డిప్యూటీ సీఎం భట్టి విక్రమార్క మాట్లాడుతూ, రాష్ట్రవ్యాప్తంగా 17లక్షల 88వేల ఉద్యోగులు, పెన్షనర్లు, వారి డిపెండెంట్లకు నేటి నుంచి 1816 వైద్య, శస్త్రచికిత్సలకు నగదు రహిత సేవలు అందుబాటులోకి వచ్చాయని తెలిపారు. ఓపీ సేవల కోసం ప్రస్తుతం 12 వెల్‌నెస్ సెంటర్లు ఉండగా త్వరలో మరో 24 ప్రారంభించనున్నట్లు వైద్యారోగ్య శాఖ మంత్రి దామోదర రాజనర్సింహా వెల్లడించారు.