షిర్డీ సాయిబాబా పరమ భక్తులలో హేమాడ్పంత్ స్థానం ప్రతి ఒక్క సాయి భక్తుని గుండెల్లో శాశ్వతంగా నిలిచి ఉంటుంది. ఎందుకంటే, నేడు మనం భక్తితో పారాయణం చేసుకునే అమృత గ్రంథం "శ్రీ సాయి సచ్చరిత్ర" ను మనకు అందించిన మహానుభావుడు ఆయనే.
హేమాడ్పంత్ అసలు పేరు గోవిందరావు రఘునాథ్ దబూల్కర్. ఆయన ముంబై ప్రభుత్వంలో ఒక ఉన్నతాధికారిగా (మేజిస్ట్రేట్గా) పనిచేసేవారు. గొప్ప విద్యావంతుడు, నిశితమైన బుద్ధి గల మేధావి. కాకాసాహెబ్ దీక్షిత్, నానాసాహెబ్ చాందోర్కర్ల ప్రేరణతో ఈయన 1910వ సంవత్సరంలో మొదటిసారి షిర్డీకి వచ్చారు.
దబూల్కర్ మొదటిసారి షిర్డీకి వచ్చినప్పుడు, ద్వారకామాయిలో ఒక భక్తుడితో "ఆధ్యాత్మిక సాధనకు గురువు అవసరమా లేదా?" అనే విషయంపై తీవ్రమైన వాదన (తర్కం) చేశారు.
ఆ తర్వాత ఆయన బాబాను దర్శించుకున్నప్పుడు, బాబా అంతర్దృష్టితో ఆయన మనసులోని గర్వాన్ని గ్రహించి, నవ్వుతూ... "ఏమండీ 'హేమాడ్పంత్'! మసీదులో అంత గట్టిగా ఏం వాదించారు?" అని అడిగారు.
'హేమాడ్పంత్' అనేది యాదవ రాజుల కాలంలో ఉన్న ఒక గొప్ప పండితుడు, మంత్రి అయిన "హేమాద్రిపంత్" పేరు మీదుగా బాబా పెట్టిన వ్యంగ్య నామం.
మొదట్లో బాబా తనను పరిహసించారని దబూల్కర్ అనుకున్నప్పటికీ, ఆ తర్వాత ఆ పేరే ఆయనకు ఒక ఆశీర్వాదంగా, కలకాలం నిలిచిపోయే కలంపేరుగా మారిపోయింది. ఆ క్షణం నుంచి bఆయనలోని తార్కిక గర్వం నశించి, బాబాకు పరమ దాసుడయ్యారు.
ఒకరోజు బాబా ద్వారకామాయిలో హఠాత్తుగా ఒక తిరగలి (రాయి) తీసుకుని గోధుమలు విసరడం ప్రారంభించారు. షిర్డీలో అప్పుడు కలరా (మహమ్మారి) వ్యాధి తీవ్రంగా ఉంది. బాబా ఆ విసిరిన గోధుమ పిండిని తీసుకువెళ్లి ఊరి పొలిమేరల్లో చల్లమని చెప్పారు. అలా చేయగానే ఆశ్చర్యకరంగా షిర్డీ నుంచి కలరా వ్యాధి పూర్తిగా మాయమైపోయింది.
ఈ అద్భుత లీలను కళ్లారా చూసిన దబూల్కర్ మనసు చలించింది. బాబా లీలలను, అమృత వాక్కులను భవిష్యత్తు తరాల కోసం గ్రంథస్థం చేయాలనే బలమైన కోరిక ఆయనలో కలిగింది.దబూల్కర్ తన కోరికను శ్యామా ద్వారా బాబాకు తెలియజేశారు. అప్పుడు బాబా ఎంతో సంతోషించి, ఆయన తలపై చేయి పెట్టి ఇలా ఆశీర్వదించారు.
"నువ్వు లీలలను రాయడానికి పూనుకో. నేను నీలో ఉండి ఈ గ్రంథాన్ని రాయిస్తాను. నా లీలలను రాసేటప్పుడు అతని అహంకారం పూర్తిగా నశిస్తుంది. నా కథలను భక్తితో చదివేవారి పాపాలు తొలగిపోయి, వారికి ముక్తి లభిస్తుంది."
బాబా ఇచ్చిన ఆ దివ్య ఆశీర్వాద బలంతోనే హేమాడ్పంత్ 'సాయి సచ్చరిత్ర' గ్రంథాన్ని మరాఠీ భాషలో ఓవీ ఛందస్సులో అద్భుతమైన కావ్యంగా రచించారు. బాబా మహాసమాధి చెందిన తర్వాత కూడా ఆయన ఎన్నో ఏళ్లు కష్టపడి ఈ గ్రంథాన్ని పూర్తి చేశారు.
హేమాడ్పంత్ షిర్డీలో ఉన్నంత కాలం ఎంతో నిగర్వంగా బతికారు. బాబా మసీదును తుడవడం, ధుని పూజలు చేయడం వంటి చిన్న చిన్న పనులను కూడా ఎంతో భక్తితో చేసేవారు. బాబా ప్రతిరోజూ ఆయనను ఎంతో ప్రేమగా పలకరించేవారు.
సాయిబాబా అనే సముద్రం నుంచి లీలలు అనే రత్నాలను ఏరి, మనకు "సాయి సచ్చరిత్ర" అనే హారంగా అందించిన అమృత హస్తం హేమాడ్పంత్ ది. నేడు ప్రపంచవ్యాప్తంగా సాయి భక్తులు బాబాను తెలుసుకుంటున్నారంటే, దానికి హేమాడ్పంత్ ప్రధాన కారణం.*
No comments:
Post a Comment