ఆత్మీయులు (1969)

యద్దనపూడి సులోచనారాణి నవల ఆధారంగా 1969లో వి. మధుసూదనరావు దర్శకత్వంలో విడుదలైన ‘ఆత్మీయులు‘ సినిమా కుటుంబ కథాచిత్రంగా ప్రశంసలందుకుంది. ఈ సినిమాలో అక్కినేని హీరోయిన్ గా వాణిశ్రీ ఇండస్ట్రీలో అగ్ర కథానాయిక స్థాయికి ఎదిగింది. సారథి స్టూడియోస్ పతాకంపై ఈ చిత్రాన్ని నిర్మించిన దుక్కిపాటి మధుసూదనరావు చిత్రానువాదం కూడా చేశారు. 

ఈ చిత్రం ఆంధ్రప్రదేశ్ ప్రభుత్వం నుంచి ద్వితీయ ఉత్తమ చిత్రంగా 1969 వ సంవత్సరానికి రజిత నంది అందుకొంది. 

జగన్నాధం (గుమ్మడి) దగ్గర పాలేరుగా పనిచేస్తున్న వీరన్న(ధూళిపాళ) కు ఒక కొడుకు సూర్యం (నాగేశ్వరరావు), ఒక కూతురు సీత (చంద్రకళ). జగన్నాధం ప్రాణాల్ని రక్షించే ప్రయత్నంలో వీరన్న చనిపోతాడు. వీరన్న భార్య మరో ఆడ బిడ్డని ప్రసవించి కన్ను మూస్తే వీరయ్య చెల్లెలు మహంకాళి (సూర్యకాంతం) ఆ బిడ్డను భానూ ప్రకాష్, రాధాకుమారి దంపతులకు అమ్మేస్తుంది. జగన్నాధం పల్లె విడిచి పట్నం వెళ్ళిపోతాడు. పిల్లల ఆలనాపాలన కోసం డబ్బు పంపించినా మేనత్త మహంకాళి (సూర్యకాంతం) వాళ్ళకి చేరకుండా వాళ్ళని కష్టాలు పెడుతుంది. ఆమె కొడుకు పద్మనాభం ను స్కూల్ కి పంపి వీళ్ళిద్దరినీ ఇంట్లో పనులు చేయిస్తుంది. సూర్యం చెల్లితో పట్నం వెళ్లిపోయి ఒక హోటల్ యజమాని అభిమానం  సంపాదించి  కష్టపడి చదివి యూనివర్సిటీలోనే ఫస్ట్ గా వస్తాడు. సీత ఇంటి పనులను చక్కగా తీర్చుదిద్దుతుంది. నిజాన్ని తెలిసిన జగన్నాధం ఇద్దర్నీ తన ఇంటికి తీసుకొని వస్తాడు. జగన్నాధానికి ఒక కొడుకు చంద్రం (చంద్రమోహన్). అన్న లాయర్ రాజారావు ( నాగభూషణం) కూతురు జయ (వాణిశ్రీ) కూడా జగన్నాథం వద్దే ఉంటుంది. సూర్యానికి దగ్గరవుతుంది. మహంకాళి అమ్మేసిన ఆడపిల్ల సరోజ  (విజయనిర్మల) ను మహంకాళి కొడుకు చిట్టిబాబు (పద్మనాభం) ప్రేమిస్తాడు. కానీ విలాసాల వ్యామోహం ఉన్న సరోజ అతడిని కాదని చంద్రం వైపు మొగ్గు చూపిస్తుంది. కానీ సీత అణకువకు ముచ్చటపడిన జగన్నాధం తన కొడుకు చంద్రానికి బలవంతంగా సీతతో వివాహం జరిపిస్తాడు. సూర్యం పోలీసు ఆఫీసరు అవుతాడు. చంద్రం సీతను వదిలేసి సరోజను పెళ్ళాడాలని చూస్తాడు. సరోజ కూడా తన చెల్లెలు అని తెలిసిన సూర్యం చివరకు పరిస్థితులన్నీ చక్కదిద్ది తాను జయను పెళ్లాడతాడు. సరోజకు చిట్టిబాబుతో పెళ్ళి జరిపిస్తాడు. సీత, చంద్రంల కాపురం నిలబెడతాడు. మహంకాళి జైలుకి వెడుతుంది. ప్రభాకర రెడ్డి విలనిజం తగు పాళ్లలో ఉంటుంది. 

చిత్రానికి ఎస్. రాజేశ్వరరావు సంగీతం పెద్ద ప్లస్. మొత్తం 9 పాటలూ హిట్. సుశీలతో ఘంటసాల డ్యూయెట్స్ - చామంతీ ఏమిటే, కళ్ళలో పెళ్లి పందిరి, అమ్మబాబు నమ్మరాదు, అన్నయ్య కలలే పండెను, ఈ రోజుల్లో పడుచువారు- ఒక ఎత్తయితే, బాలు,సుశీల డ్యూయెట్ - చిలిపి నవ్వుల నిను చూడగానే- మరో మధుర గీతం. ఇక సుశీల వీణ పాట మదిలో వీణలు మ్రోగే- ఇప్పటికీ జన హృదయాలను మీటుతూనే ఉంటుంది. మాటలు రాసిన పినిశెట్టి శ్రీరామ్మూర్తి కూడా అవసరమైన చోట్ల భావోద్వేగాలను పండించారు.*