షాబాద్ లో ఆరు హత్యల నిందితుడు ఆత్మహత్య

 హైదరాబాద్: రంగారెడ్డి జిల్లా షాబాద్‌లో ఆరు హత్యల కేసు నిందితుడు రాజ్‌కుమార్‌ మృతి చెందాడు. స్థానికులు డయల్ 100కు ఇచ్చిన సమాచారంతో కొత్తూరు మండలం పెంజర్ల వద్ద రాజ్‌కుమార్‌ మృతదేహాన్ని పోలీసులు గుర్తించారు. మృతదేహం పక్కన పాయిజన్‌ బాటిల్‌ను గుర్తించారు. నిందితుడు ఆత్మహత్య చేసుకున్నట్లు భావిస్తున్నారు. రాజ్‌కుమార్‌ మృతదేహం వద్ద సెల్‌ఫోన్‌ పోలీసులు గుర్తించారు. హత్యలకు ముందే రాజ్‌కుమార్‌ ఫోన్‌లో వీడియో రికార్డు చేసుకున్నట్లు గుర్తించారు. బాలిక కుటుంబసభ్యులు అన్ని విధాలుగా వాడుకుని మోసం చేశారని, అమ్మాయిని నమ్మి మోసపోయానని వీడియోలో పేర్కొన్నారు. ఆన్‌లైన్‌ బెట్టింగ్‌లు, అప్పుల వల్ల జీవితంపై విరక్తి చెందినట్లు, అప్పుల వల్ల భూమి కూడా కోల్పోయానని, తన పిల్లలకు భూమి కూడా లేకుండా పోయిందని రాజ్‌కుమార్‌ వీడియోలో తెలిపారు.  తనపై పోక్సో కేసు పెట్టారని బాలిక, బాలిక తల్లి, నానమ్మను నిందితుడు రాజ్​కుమార్​ శుక్రవారం రాత్రి హతమార్చాడు. అనంతరం ఇంటికి వెళ్లి భార్య సరిత, ఇద్దరు కుమారులను హత్యచేశాడు. అనంతరం అక్కడనుంచి పరారయ్యాడు. నిందితుడిని పట్టుకొనేందుకు 12 పోలీసు బృందాలు ముమ్మరంగా గాలించాయి. చివరకు కొత్తూరు సమీపంలో మృతదేహాన్ని గుర్తించారు.